English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មាធិការជាតិបណ្ដុះបណ្ដាល (NTB) បានអញ្ជើញដឹកនាំកិច្ចប្រជុំគណៈកម្មាធិការជាតិបណ្ដុះបណ្ដាល នារសៀលថ្ងៃទី៩ ខែមេសា ឆ្នាំ ២០២៦ នេះ នៅទីស្តីការក្រសួង ដើម្បីពិភាក្សាលើការពង្រឹងគុណភាព និងប្រសិទ្ធភាពការអប់រំបណ្តុះបណ្តាលបច្ចេកទេស និងវិជ្ជាជីវៈឱ្យកាន់តែប្រសើរឡើង ព្រមទាំងឆ្លើយតបទៅនឹងតម្រូវការនៃការវិវឌ្ឍរីកចម្រើនសង្គមសេដ្ឋកិច្ចបច្ចុប្បន្ន និងអនាគត។ ប្រធានបទសំខាន់ៗចំនួន៣ ត្រូវបានលើកយកមកពិភាក្សាក្នុងកិច្ចប្រជុំនាពេលនេះ រួមមាន៖ ទស្សនវិស័យមុខរបរ និងការងារ, គន្លងអប់រំថ្មីនៅកម្ពុជា និងការអនុវត្តការវាយតម្លៃការធ្វើតេស្ដទទួលស្គាល់ជំនាញពីមុន (RPL) និងក្រុមប្រឹក្សាជំនាញតាមវិស័យ (SSC)។
នាឱកាសនោះ ឯកឧត្តមរដ្ឋមន្រ្តីបានវាយតម្លៃខ្ពស់ចំពោះកិច្ចខិតខំបំពេញភារកិច្ចប្រកបដោយស្មារតីទទួលខុសត្រូវខ្ពស់របស់គណៈកម្មាធិការ រហូតដល់ទទួលបានលទ្ធផលជាទីមោទនៈ ដោយឯកឧត្តមមានប្រសាសន៍ថា ប្រធានបទទាំងបីនេះគឺសុទ្ធតែសំខាន់ដែលក្រសួងបានធ្វើការបោះពុម្ពផ្សាយកន្លងមកហើយដែរ ហើយសង្ឃឹមថា អង្គប្រជុំនៅពេលនេះនឹងផ្តល់ជាធាតុចូលបន្ថែមទៀតដើម្បីពង្រឹងគុណភាព និងធ្វើបច្ចុប្បន្នភាពលើទស្សនវិស័យមុខរបរនិងការងារឱ្យកាន់តែល្អប្រសើរសម្រាប់ជាប្រយោជន៍ដល់ក្រសួងពាក់ព័ន្ធ វិស័យឯកជន និងដៃគូអភិវឌ្ឍន៍ ជាពិសេសពីចំណុចនៃតម្រូវការទីផ្សារ គម្លាតជំនាញ និងការបែងចែកតួនាទីឱ្យកាន់តែល្អប្រសើរជាដើម។
ដើម្បីជួយតម្រង់ទិសសិក្សាដល់សិស្សានុសិស្សចាប់ពីកម្រិតអនុវិទ្យាល័យទៅ ឯកឧត្តម ហេង សួរ បញ្ជាក់ពីគម្រោងការដាក់ឱ្យអនុវត្តសាកល្បងនៃកម្មវិធី «គន្លងអប់រំថ្មី» សម្រាប់ឆ្នាំសិក្សា២០២៦-២០២៧ លើមុខជំនាញបច្ចេកទេស និងវិជ្ជាជីវៈសំខាន់ៗចំនួន២១ នៅតាមតំបន់គោលដៅសំខាន់ៗមួយចំនួននៅជិតតំបន់សេដ្ឋកិច្ចពិសេស សួនឧស្សាហកម្ម និងវិទ្យាល័យ ក្រោមកិច្ចសហការជាមួយដៃគូអភិវឌ្ឍ។ កម្មវិធីនេះនឹងត្រូវអនុវត្តដាច់ដោយឡែកពីគ្នាយ៉ាងច្បាស់លាស់ដោយក្រសួងអប់រំយុវជននិងកីឡា និងក្រសួងការងារ ស្របតាមអនុសាសន៍ណែនាំដ៏ខ្ពង់ខ្ពស់ពីសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រី ហើយលទ្ធផលនៃការអនុវត្តសាល្បងនេះនឹងក្លាយទៅជាមូលដ្ឋានគ្រឹះសម្រាប់ការអនុវត្តបន្តនាពេលក្រោយទៀត។
ឯកឧត្តមរដ្ឋមន្រ្តីមានប្រសាសន៍ថា ចំពោះ RPL វិញគឺជាកម្មវិធីដែលរាជរដ្ឋាភិបាល ក៏ដូចជា ក្រសួងការងារកំពុងតែយកចិត្តទុកដាក់ខ្ពស់សម្រាប់ផ្ដល់ការធ្វើតេស្តទទួលស្គាល់សមត្ថភាពជំនាញ ក្នុងវិស័យសំណង់ចំនួន ៨មុខ ជូនដល់អតីពលករមកពីថៃដោយឥតគិតថ្លែចំនួន ១ម៉ឺននាក់ក្នុងជំហានទី ១ ដើម្បីឱ្យពួកគាត់អាចយកទៅប្រើប្រាស់ក្នុងការស្វែងរកការងារនៅក្នុងស្រុកផង និងនៅក្រៅប្រទេសផង ដូចជានៅសិង្ហបុរី ដែលកំពុងតែត្រូវការកម្លាំងកម្មករជំនាញផ្នែកសំណង់។
ឯកឧត្តមបានចាត់ទុក RPL គឺដើម្បីប្រែក្លាយពី «សញ្ញាឃើញ» ទៅជាវិញ្ញាបនបត្រជាផ្លូវការ ក្នុងការអភិវឌ្ឍធនធានមនុស្ស បង្កើនផលិតភាពនិងភាពប្រកួតប្រជែង និងជួយអតីតពលកររកការងារល្អនិងមានប្រាក់ចំណូលកាន់តែខ្ពស់។
ទន្ទឹមនេះ ឯកឧត្តម ហេង សួរ បានជំរុញឱ្យមានការចូលរួមផ្សព្វផ្សាយពីចុះឈ្មោះចូលរៀនកម្មវិធី TVET ក៏ដូចជាចុះឈ្មោះក្នុងកម្មវិធី RPL ព្រមទាំងជំរុញឱ្យសមាជិក សមាជិការនៃ NTB បន្តបេសកកម្មដ៏ចាំបាច់នេះ ដើម្បីសម្រេចគោលដៅដែលបានរំពឹងទុក៕
#MLVT #HENGSour #TVET
