ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(រាជធានីភ្នំពេញ)៖ បន្ទាប់ពីបានខិតខំរួមគ្នាសម្រេចបាននូវការដាក់ឱ្យដំណើរការជាផ្លូវការនូវមជ្ឈមណ្ឌលឧត្តមភាពយានយន្តកម្ពុជា (ACE Cambodia) ជាលើកដំបូង ដែលជាផ្លែផ្កានៃកិច្ចសហប្រតិបត្តិការកម្ពុជា-អូស្ត្រាលីលើការអភិវឌ្ឍជំនាញនៅកម្ពុជាកាលពីម្សិលមិញរួចមក, នារសៀលថ្ងៃអង្គារ ទី១៧ ខែមីនា ឆ្នាំ២០២៦ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្ដែងការគួរសម និងពិភាក្សាការងារជាមួយ លោកស្រី ប្រីជែត ខូលៀរ (Bridget Collier) ភារធារីស្ថានទូតអូស្ត្រាលីប្រចាំកម្ពុជា និង លោកស្រី សារ៉ន ប៊ូរ៉ូ (Sharan Burrow) ប្រធានក្រុមប្រឹក្សានៃវិទ្យាស្ថាន Bendigo Kangan (BKI) នៅទីស្តីការក្រសួង ដើម្បីពិភាក្សាផ្លាស់ប្តូរយោបល់ក្នុងការស្វែងរកឱកាសពង្រីកកិច្ចសហប្រតិបត្តិការថ្មីៗបន្ថែមទៀត ឆ្លើយតបទៅនឹងតម្រូវការទីផ្សារការងារ ដែលវិស័យឧស្សាហកម្មនៅកម្ពុជាកំពុងមានតម្រូវការខ្ពស់។
ក្នុងបរិយាកាសដ៏រីករាយ ឯកឧត្តមរដ្ឋមន្ត្រីបានសម្តែងនូវការកោតសរសើរ និងវាយតម្លៃខ្ពស់ចំពោះការចូលរួមចំណែកយ៉ាងសកម្មពីសំណាក់ស្ថានទូតអូស្រ្តាលី និងវិទ្យាស្ថាន BKI ជាមួយក្រុមការងារក្រសួងការងារ និងបណ្តុះបណ្តាលវិជ្ជាជីវៈ សម្រាប់ការជឿជាក់ជ្រើសរើសបង្កើតបានភាពជាដៃគូ ឈានដល់ការសម្រេចបាននូវសមិទ្ធផលជាប្រវត្តិសាស្រ្តនេះ។ សមិទ្ធផលនេះ គឺជាចំណុចចាប់ផ្តើមដ៏សំខាន់មួយ សម្រាប់ជាគំរូឈានទៅពង្រីកឱកាសក្នុងការរួមគ្នាអភិវឌ្ឍជំនាញប្រកបដោយស្តង់ដាខ្ពស់នៅកម្ពុជា។ តាមរយៈការបន្តពិភាក្សាប្រកបដោយការស្ថាបនា និងការផ្លាស់ប្តូរទស្សនៈគ្នាដោយភាពស្និទ្ធស្នាល ឯកឧត្តមបានសម្តែងក្តីសង្ឃឹមយ៉ាងមុតមាំក្នុងការពង្រីកកិច្ចសហការថ្មីៗបន្ថែមទៀត ដើម្បីរួមចំណែកក្នុងការអភិវឌ្ឍវិស័យបណ្តុះបណ្តាលជំនាញតាមស្តង់ដារអូស្រ្តាលីនៅកម្ពុជា។
ឯកឧត្តមបានលើកឡើងពីវឌ្ឍនភាពនៃការអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស (TVET) ដល់យុវជនគោលដៅ ១.៥ លាននាក់ ដែលជាសសរស្តម្ភសំខាន់នៃការអភិវឌ្ឍជំនាញនៅកម្ពុជា ជាពិសេសការពង្រឹងការអភិវឌ្ឍកម្លាំងពលកម្ម ដោយផ្តល់ការបណ្តុះបណ្តាលវិជ្ជាជីវៈឥតគិតថ្លៃសម្រាប់យុវជនមកពីគ្រួសារក្រីក្រ និងងាយរងហានិភ័យ ព្រមទាំងសិស្សបោះបង់ការសិក្សាផងដែរ ដើម្បីជាមធ្យោបាយឱ្យយុវជនទទួលបានជំនាញមុនចូលទីផ្សារការងារ ដោយសារតែកម្មវិធី TVET មានភាពបត់បែនខ្ពស់។
ទន្ទឹមនឹងនេះ កម្ពុជាក៏កំពុងផ្តល់អាទិភាពដល់ការបណ្តុះបណ្តាលដែលមានគុណភាពខ្ពស់ និងសមស្របនឹងតម្រូវការឧស្សាហកម្ម ដើម្បីធានាថានិស្សិតបញ្ចប់ការសិក្សាអាចបំពេញតម្រូវការរបស់និយោជកបាន ព្រមទាំងកំពុងធ្វើទំនើបកម្មប្រព័ន្ធ TVET ដើម្បីឆ្លើយតបទៅនឹងការផ្លាស់ប្តូរបច្ចេកវិទ្យា សេដ្ឋកិច្ចឌីជីថល និងការផ្លាស់ប្តូរទៅរកសេដ្ឋកិច្ចបៃតង។ លើសពីនេះ ឯកឧត្តមក៏បានគូសបញ្ជាក់ពីតម្រូវការនៃការបណ្តុះបណ្តាលជំនាញទន់ (Soft Skills) ផងដែរ ដែលវិទ្យាស្ថាន BKI អាចពិចារណាក្នុងការពង្រីកការបណ្តុះបណ្តាលនាពេលអនាគត។
ជាការឆ្លើយតប ភាគីអូស្រ្តាលីបានថ្លែងអំណរគុណចំពោះក្រសួងការងារ និងសម្ដែងនូវការអបអរសាទរចំពោះភាពជោគជ័យនៃកិច្ចសហការជាមួយវិទ្យាស្ថាន BKI ក៏ដូចជាក្រុមហ៊ុន RMA Cambodia ដោយគូសបញ្ជាក់ថា មជ្ឈមណ្ឌល ACE Cambodia ពិតជាមានសារៈប្រយោជន៍ខ្លាំងចំពោះការអភិវឌ្ឍធនធានមនុស្សនៅកម្ពុជា ដែលជាសញ្ញានៃការរីកចម្រើនទំនាក់ទំនង និងការពង្រឹងចំណងមិត្តភាពរវាងប្រជាជាតិទាំងពីរ។ ភាគីអូស្ត្រាលី ក៏បានបញ្ជាក់ពីការប្តេជ្ញាចិត្ត និងការត្រៀមខ្លួនជានិច្ចក្នុងការគាំទ្រ និងពង្រឹងទំនាក់ទំនងកិច្ចសហការបន្តជាមួយក្រសួងការងារ និងបណ្ដុះបណ្ដាលវិជ្ជាជីវៈ ក្នុងការលើកកម្ពស់ការអនុវត្តស្តង់ដារជំនាញប្រកបដោយនិរន្តរភាព ក៏ដូចជាពង្រឹងភាពប្រកួតប្រជែងនៅកម្ពុជា។
#MLVT #HENGSour #TVET
