ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ សហព័ន្ធសហជីព នៃសាធារណរដ្ឋប្រជាមានិតឡាវ បានប្តេជ្ញាគាំទ្រកម្ពុជា នៅលើឆាកអន្តរជាតិក្នុងការអនុវត្តគោលនយោបាយរបស់រាជរដ្ឋាភិបាលលើវិស័យការងារ ព្រមទាំងជំរុញកិច្ចសហប្រតិបត្តិការរវាងភាគីសហជីពនៃប្រទេសទាំងពីរ ដើម្បីការពារនូវសិទ្ធិនិងផ្តល់នូវផលប្រយោជន៍ជាអតិបរមាជូនកម្មករនិយោជិតកម្ពុជា និងឡាវ។
ការគាំទ្រនេះធ្វើឡើងក្នុងជំនួបសម្តែងការគួរសមដោយលោកស្រី អាលី វង្សណូប៊ុនថាំ (Aly VONGNOBOUNTHAM) ប្រធានសហព័ន្ធសហជីព នៃសាធារណរដ្ឋប្រជាមានិតឡាវ ជាមួយឯកឧត្តម សោម ចំណាន រដ្ឋលេខាធិការ ក្នុងនាមជាតំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នារសៀលថ្ងៃទី១៩ ខែកញ្ញា ឆ្នាំ២០២៣ នៅទីស្ដីការក្រសួងការងារ។
ក្នុងឱកាសនោះ ឯកឧត្តមរដ្ឋលេខាធិការ បានលើកឡើងពីប្រវត្តិនៃកិច្ចសហប្រតិបត្តិការ និងទំនាក់ទំនងដ៏យូរអង្វែងនៃប្រទេសទាំងពីរ និងគូសបញ្ជាក់ពីការរីកចម្រើននៃកិច្ចសហប្រតិបត្តិការលើគ្រប់វិស័យ ដូចជាវិស័យសេដ្ឋកិច្ច ពាណិជ្ជកម្ម ការងារ អប់រំ ជាដើម។
ជាមួយគ្នានេះ ឯកឧត្តមរដ្ឋលេខាធិការ បានអបអរសាទរចំពោះការឈានដល់ការចុះកិច្ចព្រមព្រៀង រវាងសភាសម្ព័ន្ធសហជីពជាតិកម្ពុជា (NACC) និងសហព័ន្ធសហជីព នៃសាធារណរដ្ឋប្រជាមានិតឡាវ (LFTU) ដែលនឹងធ្វើឡើងជាផ្លូវការនៅថ្ងៃទី២០ ខែកញ្ញា ឆ្នាំ២០២៣ ស្អែកនេះ។
ក្នុងនោះដែរ ឯកឧត្តមរដ្ឋលេខាធិការបានបញ្ជាក់បន្ថែមអំពីតួនាទីដ៏សំខាន់របស់សហជីពក្នុងនាមជាតំណាង របស់កម្មករនិយោជិត និងជាដៃគូសន្ទនា ក្នុងការចរចាលក្ខខណ្ឌការងារ ទំនាក់ទំនងវិជ្ជាជីវៈ និងអត្ថប្រយោជន៍ផ្សេងៗរបស់កម្មករនិយោជិត ដើម្បីធ្វើយ៉ាងណាផ្តល់នូវប្រយោជន៍ខ្ពស់បំផុតដល់កម្មករ។
ជាកិច្ចឆ្លើយតប លោកស្រី អាលី វង្សណូប៊ុនថាំ បានវាយតម្លៃខ្ពស់នូវកិច្ចសហប្រតិបត្តិការដ៏ល្អរវាងប្រទេសទាំងពីរ ដែលជាប្រទេសបងប្អូនជាប់របងគ្នា។ លោកស្រីប្រធានសហព័ន្ធបានឱ្យដឹងថា សហជីពនៅក្នុងប្រទេសឡាវនៅតែដើរតួនាទីយ៉ាងពេញលេញក្នុងការអនុវត្តការការពារសិទ្ធិ និងផលប្រយោជន៍របស់កម្មករនិយោជិត ព្រមទាំងគាំទ្រការអនុវត្តគោលនយោបាយរបស់រាជរដ្ឋាភិបាលលើវិស័យការងារ។
លោកស្រីមានសេចក្តីសោមន្សចំពោះកិច្ចសហប្រតិបត្តិការរបស់សហជីពនៃប្រទេសទាំងពីរ។ សហព័ន្ធសហជីព នៃសាធារណរដ្ឋប្រជាមានិតឡាវបានប្តេជ្ញា និងត្រៀមខ្លួនរួចជាស្រេចក្នុងការគាំទ្រកម្ពុជា និងសង្ឃឹមថាកិច្ចសហប្រតិបត្តិការលើកនេះនឹងឈានទៅកាន់ការផ្លាស់ប្តូរយោបល់ និងបទពិសោធន៍ទៅវិញទៅមកជាអតិបរមា។
នៅចុងបញ្ចប់ ឯកឧត្តមរដ្ឋលេខាធិការ បានថ្លែងអំណរគុណដល់រដ្ឋាភិបាលឡាវ ដែលបានគាំទ្រកម្ពុជាក្នុងអណត្តិជាប្រធានអាស៊ានកាលពីឆ្នាំ២០២២ កន្លងមក ជាពិសេសគាំទ្រឱ្យសម្រេចបាននូវសេចក្តីថ្លែងការណ៍អាស៊ាន ស្តីពីចល័តភាពនៃរបបសន្តិសុខសង្គមសម្រាប់ពលករទេសន្តរប្រវេសក៍អាស៊ាន។ កម្ពុជាបានត្រៀមខ្លួនរួចជាស្រេចក្នុងការជួយគាំទ្រសាធារណរដ្ឋប្រជាមានិតឡាវក្នុងអាណត្តិជាប្រធានអាស៊ាននៅក្នុងឆ្នាំ២០២៤ បន្ទាប់ពីប្រទេសឥណ្ឌូណស៊ី។