ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅរសៀលថ្ងៃពុធ ទី២១ ខែកុម្ភៈ ឆ្នាំ២០២៤នេះ បានអនុញ្ញាតឱ្យគណៈគ្រប់គ្រងនៃមន្ទីរពេទ្យសាន់រ៉ាយស៍របស់ប្រទេសជប៉ុនប្រចាំនៅកម្ពុជា បានចូលជួបសំដែងការគួរសមនៅទីស្តីការក្រសួង ដើម្បីស្វែងយល់ពីការបណ្តុះបណ្តាល និងការចុះកម្មសិក្សារបស់និស្សិតកម្ពុជានៅមន្ទីរពេទ្យសាន់រ៉ាយស៍។
ក្រោយការស្វាគមន៍របស់ឯកឧត្តមរដ្ឋមន្ត្រី លោក KAMATA Keiya ប្រធានក្រុមប្រឹក្សាភិបាល និងជានាយកប្រតិបត្តិក្រុមហ៊ុនសាន់រាយ ស៍បានរាយការណ៍ពីសកម្មភាពការងាររបស់ខ្លួនដែលបានបម្រើលើសេវាសុខាភិបាលនៅកម្ពុជារយៈពេល៧ឆ្នាំ។ លោកនាយកប្រតិបត្តិ បានបន្តលើកឡើងពីការបណ្តុះបណ្តាលបុគ្គលិក និងសិក្ខាកាមកម្ពុជាដែលមន្ទីរពេទ្យបានទទួលបណ្តុះបណ្តាលទំាងក្នុងប្រទេស និងការបណ្តុះបណ្តាលនៅប្រទេសជប៉ុនតាំងពីឆ្នាំ២០១៧ រហូតដល់បច្ចុប្បន្ន។
ជាមួយគ្នានោះ ឯកឧត្តមរដ្ឋមន្ត្រី បានវាយតម្លៃខ្ពស់ចំពោះសកម្មភាពមនុស្សធម៌ដែលមន្ទីរពេទ្យបានអនុវត្តតាមសកម្មភាពផ្សេងៗក្នុងសង្គម ជាពិសេសការបណ្តុះបណ្តាលជំនាញ តាមរយៈកម្មសិក្សាដល់និស្សិតកម្ពុជាឱ្យទទួលបានជំនាញ សីលធម៌ និងវប្បធម៌ធ្វើការបែបទំនើបរបស់ជប៉ុនផងដែរ។
បន្ថែមពីនោះ ឯកឧត្តមរដ្ឋមន្ត្រី បានគូសបញ្ជាក់ពីការអនុវត្តតាមកាតព្វកិច្ចរបស់មន្ទីរពេទ្យជប៉ុននៅកម្ពុជាក្នុងនាមជាវិស័យឯកជន ដែលអនុលោមទៅតាមច្បាប់ការងារដែលបានចែងស្តីពីកាតព្វកិច្ចហ្វឹកហ្វឺនកូនជាងដែលជាកិច្ចការងារអាទិភាពមួយរបស់ក្រសួង និងរាជរដ្ឋាភិបាលកម្ពុជាក្នុងអាណត្តិទី៧នេះ និងជាអនុសាសន៍មួយក្នុងចំណោមអនុសាសន៍របស់សម្តេចធិបតីមកកាន់ក្រសួងការងារ និងបណ្តុះបណ្តាលវិជ្ជាជីវៈ ដែលមានគោលបំណងផ្តល់ការហ្វឹកហ្វឺន និងបំពាក់បំប៉នជំនាញដល់សិស្ស និស្សិតលើការងារជាក់ស្តែង និងឱកាសទទួលបានការងារធ្វើទៀតផង៕
#MLVT #HENGSour
