ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ពោធិ៍សាត់)៖ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយទីភ្នាក់ងារអង្គការសហប្រជាជាតិនៅកម្ពុជា និងដៃគូអភិវឌ្ឍ បានរៀបចំសិក្ខាសាលាបណ្តុះបណ្តាលស្តីពីប្រព័ន្ធគ្រប់គ្រងនិងវាយតម្លៃសម្រាប់កម្មវិធី DEY III រយៈពេល២ថ្ងៃ នៅថ្ងៃទី១-២ ខែមេសា ឆ្នាំ២០២៥ នៅខេត្តពោធិ៍សាត់។
សិក្ខាសាលានេះមានគោលបំណងពង្រឹងសមត្ថភាពក្រុមការងារអនុវត្ដការងាររួម (JPT) លើការគ្រប់គ្រង និងវាយតម្លៃកម្មវិធីនេះ និងពង្រឹងការតាមដានលទ្ធផលគម្រោង ដើម្បីធានាការគាំទ្រដល់ការងាររបស់យុវជននៅកម្ពុជា ប្រកបដោយបរិយាប័ន្ន និងប្រសិទ្ធភាព។ នៅក្នុងសិក្ខាសាលានេះ សិក្ខាកាមនឹងធ្វើការរួមគ្នាដើម្បីអភិវឌ្ឍប្រព័ន្ធគ្រប់គ្រង និងវាយតម្លៃកម្មវិធីមួយប្រកបដោយសង្គតិភាព និងនវានុវត្តន៍។
តាងនាមក្រសួងការងារ និងបណ្តុះបណ្តាលវិជ្ជាជីវៈ លោកជំទាវ ហ៊ឹម សុធារ័ត្ន អនុរដ្ឋលេខាធិការ និងជាសហប្រធានអចិន្ត្រៃយ៍នៃក្រុមការងារអនុវត្តកម្មវិធីរួម បានគូសបញ្ជាក់ពីសមិទ្ធិផលដែលបានសម្រេចកន្លងមករបស់កម្មវិធី DEY នេះ រួមមានការគាំទ្រដល់យុវជនជាង ១ ១០០នាក់ ក្នុងឆ្នាំ២០២៤ ដែលក្នុងនោះមានសមាសភាពជិតពាក់កណ្តាលសុទ្ធសឹងតែជាស្ត្រី។ លោកជំទាវ ក៏បានបន្តលើកទឹកចិត្តដល់ដៃគូសហការពាក់ព័ន្ធទាំងអស់ឱ្យចូលរួមយ៉ាងសកម្មក្នុងអំឡុងពេលសិក្ខាសាលានេះ ហើយបានបញ្ជាក់ជាថ្មីពីការប្តេជ្ញចិត្តរបស់ក្រសួងក្នុងការធានាថា គ្មានយុវជនណាម្នាក់ត្រូវបានទុកចោលក្នុងដំណើរឆ្ពោះទៅរកការងារសមរម្យ និងបរិយាប័ន្នរបស់ប្រទេសកម្ពុជាឡើយ។
លោក លាវ គឹមឡាយ ដែលជាសហប្រធានប្តូរវេននៃក្រុមការងារកម្មវិធី បានថ្លែងអំណរគុណចំពោះដៃគូអភិវឌ្ឍទាំងអស់ចំពោះការរួមចំណែកខិតខំប្រឹងប្រែងនិងសហការយ៉ាងសកម្មក្នុងរយៈពេលប៉ុន្មានឆ្នាំកន្លងមក ដើម្បីជំរុញដល់លទ្ធផលរបស់កម្មវិធី DEY III។
កម្មវិធី DEY III ត្រូវបានសហការអនុវត្តដោយក្រសួងការងារ និងបណ្តុះបណ្តាលវិជ្ជាជីវៈ, ក្រសួងអប់រំ យុវជន និងកីឡា, ក្រសួងទេសចរណ៍, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងសង្គមកិច្ច អតីតយុទ្ធជន និងយុវនីតិសម្បទា, សហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA), និងទីភ្នាក់ងារអង្គការសហប្រជាជាតិចំនួន ៤ រួមមាន ILO, UNESCO, UNICEF និង UNIDO។ កម្មវិធីនេះត្រូវបានគាំទ្រមូលនិធិដោយទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ជាមួយនឹងការចូលរួមចំណែកពីរាជរដ្ឋាភិបាលកម្ពុជា និងដៃគូឯកជននានា៕
#MLVT #HENGSour
