ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ម៉ានីល)៖ ឯកឧត្តម ម៉ម វណ្ណៈ រដ្ឋលេខាធិការ និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិត អ៉ិត សំហេង បានដឹកនាំប្រតិភូក្រសួងការងារ និងបណ្តុះបណ្តាលវិជ្ជាជីវៈ ចូលរួមកិច្ចប្រជុំរដ្ឋមន្រ្តីការងារអាស៊ាន លើកទី២៧ និងកិច្ចប្រជុំរដ្ឋមន្រ្តីការងារអាស៊ានបូកបី (ចិន ជប៉ុន និងសាធារណរដ្ឋកូរ៉េ) លើកទី១២ ក្រោមមូលបទ “រួមគ្នាជាធ្លុងមួយ៖ ការកែទម្រង់ពិភពនៃការងារឡើងវិញ តាមមាគ៌ាអាស៊ានឆ្ពោះទៅរកការស្តារឡើងវិញ និងការរីកចម្រើនបែបឌីជីថល បរិយាប័ន្ន និង និងចីរភាព˝ នៅថ្ងៃទី២៨-២៩ ខែតុលា ឆ្នាំ២០២២។
កិច្ចប្រជុំទាំងពីរនេះ ត្រូវបានរៀបចំធ្វើជាម្ចាស់ផ្ទះ នឹងដឹកនាំដោយក្រសួងការងារ និងមុខរបរហ្វ៊ីលីពីន ក្នុងនាមជាប្រធានប្តូរវេននៃ ALMM ឆ្នាំ២០២២-២០២៤ ហើយមានការចូលរួមពីរដ្ឋមន្ត្រី/ប្រធានប្រតិភូក្រសួងការងារនៃរដ្ឋសមាជិកអាស៊ានទាំង១០ និងប្រទេសបូកបី អគ្គលេខាធិការរងអាស៊ាន ប្រធានអង្គភាពតាមវិស័យក្រោមឱវាទ ALMM ប្រតិភូ និងភាគីពាក់ព័ន្ធផ្សេងៗទៀត ប្រមាណ១៣០នាក់។
នៅក្នុងកិច្ចប្រជុំ រដ្ឋមន្រ្តី/ប្រធានប្រតិភូនៃរដ្ឋសមាជិកអាស៊ាន បានពិនិត្យមើលលទ្ធផលនៃកិច្ចប្រជុំអាស៊ានផ្សេងៗដែលពាក់ព័ន្ធនឹងវិស័យការងារ និងឯកសារសំខាន់ៗដែលបានឯកភាព និងអនុម័តដោយរដ្ឋមន្រ្តីការងារអាស៊ាន និងរដ្ឋមន្រ្តីការងារអាស៊ានបូកបី ក្នុងរយៈពេល២ឆ្នាំកន្លងមកនេះ និងចែករំលែកទស្សនៈ និងមតិយោបល់ទាក់ទងនឹងមូលបទដែលប្រទេសហ្វ៊ីលីពីនបានជ្រើសរើសសម្រាប់អាណត្តិជាប្រធាន ALMM របស់ខ្លួនក្នុងការរួមគ្នាជាធ្លុងមួយ។
ក្នុងនោះផងដែរ ឯកឧត្តម ម៉ម វណ្ណៈ បានកោតសរសើរដល់រដ្ឋសមាជិកអាស៊ាន និងប្រទេសចិន ជប៉ុន និងកូរ៉េខាងត្បូង ដែលតែងតែផ្តល់កិច្ចសហប្រតិបត្តិការ រហូតសម្រេចបានលទ្ធផលការងារជាច្រើនក្នុងវិស័យការងារ នៅរយៈពេល២ឆ្នាំកន្លងមកនេះ។
ទន្ទឹមនឹងនេះ ឯកឧត្តមរដ្ឋលេខាធិការក៏បានថ្លែងអរគុណដល់រដ្ឋសមាជិកអាស៊ាន ទាំងកម្រិតរដ្ឋមន្រ្តី និងឧត្តមមន្រ្តី ដែលបានផ្តល់ការគាំទ្រ និងការចូលរួមយ៉ាងសកម្ម ដល់ការរៀបចំសេចក្តីថ្លែងការណ៍ ស្តីពីចល័តភាពនៃអត្ថប្រយោជន៍សន្តិសុខសង្គមសម្រាប់ពលករទេសន្តរប្រវេសក៍ ក្នុងតំបន់អាស៊ាន ដែលជាអាទិភាពមួយរបស់កម្ពុជា ក្នុងពេលដែលកម្ពុជាធ្វើជាប្រធានអាស៊ានឆ្នាំ២០២២ នេះ។ ឯកឧត្តម ជឿជាក់យ៉ាងមុតមាំថា ក្រោយពីការអនុម័តនៅក្នុងកិច្ចប្រជុំកំពូលអាស៊ាននៅឆ្នាំនេះរួចមក សេចក្តីថ្លែងការណ៍នេះ នឹងចូលរួមចំណែក និងបញ្ជាក់ជាថ្មីនូវការប្តេជ្ញាចិត្តរបស់អាស៊ាន ក្នុងការការពារ និងការលើកកម្ពស់សិទ្ធិរបស់ពលករទេសន្តរប្រវេសក៍ បន្ថែមពីលើសេចក្តីថ្លែងការណ៍ទីក្រុងសេប៊ូ និងឯកច្ឆន្ទភាពអាស៊ាន៕