ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
នាថ្ងៃទី៥ ខែកញ្ញា ឆ្នាំ២០២៣ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមក្នុងពិធីបុណ្យជាតិលើកទី៦៦របស់ប្រទេសម៉ាឡេស៊ី ក្រោមវត្តមានឯកឧត្តម Datuk Eldeen Husaini Mohd Hashim ឯកអគ្គរាជទូតសហព័ន្ធម៉ាឡេស៊ីប្រចាំព្រះរាជាណាចក្រកម្ពុជា ដើម្បីអបអរសាទរជាមួយប្រជាពលរដ្ឋម៉ាឡេស៊ីនៅទូទាំងពិភពលោក ក្នុងការប្រារព្ធទិវាបុណ្យជាតិរបស់ខ្លួន។
នាឱកាសនោះដែរ ឯកឧត្តម ហេង សួរ បានសម្ដែងនូវការអបអរសាទរដោយស្មោះអស់ពីដួងចិត្តចំពោះប្រជាជននិងរដ្ឋាភិបាលម៉ាឡេស៊ី ចំពោះថ្ងៃដ៏វិសេសវិសាលនេះ។
ឯកឧត្តមរដ្ឋមន្ត្រីបានបញ្ជាក់ថា កម្ពុជានិងម៉ាឡេស៊ីបានខិតខំកសាងនូវមិត្តភាពដ៏ល្អនិងយូរអង្វែង និងមានទំនាក់ទំនងយ៉ាងជិតស្និទ្ធបំផុតមួយក្នុងតំបន់អាស៊ាន។ ប្រទេសយើងទាំងពីរនៅតែបន្តពង្រឹងកិច្ចសហប្រតិបត្តិការពាណិជ្ជកម្មទ្វេភាគី បន្តពង្រឹងទំនាក់ទំនងប្រជាជននិងប្រជាជនយ៉ាងស្អិតល្មួតជាមួយគ្នា។ ជាក់ស្តែង ទំហំពាណិជ្ជកម្មបានកើនឡើងពី៥០០លានដុល្លារអាម៉េរិក នៅឆ្នាំ២០២១ ដល់៦២០លានដុល្លារអាម៉េរិក នៅឆ្នាំ២០២២ ហើយ៧ខែដើមឆ្នាំ២០២៣នេះ ទំហំពាណិជ្ជកម្មបានកើនដល់៣៧៧លានដុល្លារអាម៉េរិក។ ក្នុងនោះដែរ យើងឃើញថា ម៉ាឡេស៊ីឈរនៅលំដាប់ថ្នាក់ទី៦ក្នុងចំណោមប្រទេសដែលបានបោះទុនវិនិយោគច្រើនជាងគេនៅកម្ពុជា។
ឯកឧត្តមរដ្ឋមន្ត្រីបានបន្តថា មួយវិញទៀត ភ្ញៀវទេសចរម៉ាឡេស៊ីដែលមកទស្សនានៅកម្ពុជាបានកើនឡើងជាលំដាប់ ពោលគឺចាប់ពីជាង២.៥ម៉ឺននាក់ នៅឆ្នាំ២០២០ កើនឡើងមកដល់ជាង៥.៣ម៉ឺននាក់ នៅឆ្នាំ២០២២។ បើគិតត្រឹម៧ខែដើមឆ្នាំ២០២៣នេះ ភ្ញៀវទេសចរម៉ាឡេស៊ីជាង៥.២ម៉ឺននាក់បានមកទស្សនានៅកម្ពុជា។
ទន្ទឹមនឹងនេះ យើងក៏មិនភ្លេចដែរថា ប្រជាពលរដ្ឋនិងនិស្សិតខ្មែរជាង២.២ម៉ឺននាក់កំពុងធ្វើការនិងសិក្សានៅប្រទេសម៉ាឡេស៊ី ដើម្បីកសាងសមត្ថភាព និងស្វែងរកប្រាក់ចំណូលផ្គត់ផ្គង់គ្រួសារ។
ឆ្លៀតក្នុងឱកាសនេះ ឯកឧត្តមរដ្ឋមន្ត្រី តាងនាមរដ្ឋាភិបាលកម្ពុជា សូមថ្លែងអំណរគុណដល់រដ្ឋាភិបាលនិងប្រជាជនម៉ាឡេស៊ី ដែលបានយកចិត្តទុកដាក់ចំពោះប្រជាពលរដ្ឋនិងនិស្សិតខ្មែរដែលកំពុងមានវត្តមាននៅក្នុងប្រទេសម៉ាឡេស៊ី៕
