ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ហាណូយ-វៀតណាម)៖ នៅថ្ងៃទី៥ ខែមេសា ឆ្នាំ២០២៣ ឯកឧត្ដមបណ្ឌិត អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំប្រតិភូចូលជួបសម្ដែងការគួរសមជាមួយឯកឧត្តម TRAN HONG HA ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម។
ក្នុងឱកាសនោះ ឯកឧត្ដមបណ្ឌិត បានថ្លែងអំណរគុណដល់ប្រទេសវៀតណាមដែលតែងតែសហការ និងជួយគាំទ្រដល់ការអភិវឌ្ឍរបស់កម្ពុជាលើគ្រប់វិស័យ ក្នុងនាមជាប្រទេសជិតខាង និងក្នុងតំបន់អាស៊ានជាមួយគ្នា តាំងពីដើមរៀងមក ជាពិសេសលើវិស័យការងារ និងបណ្តុះបណ្តាលវិជ្ជាជីវៈ។
ឯកឧត្ដមបណ្ឌិត ក៏បានជម្រាបជូននូវវឌ្ឍភាពថ្មីៗ ដែលក្រសួងការងារ និងបណ្តុះបណ្តាលវិជ្ជាជីវៈកម្ពុជា និងក្រសួងការងារ ជនពិការ និងសង្គមកិច្ចវៀតណាម បានចុះហត្ថលេខាលើអនុស្សរណៈនៃការយោគយល់គ្នាក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ នៅកម្ពុជាកាលពីថ្ងៃទី៨ ខែវិច្ឆិកា ឆ្នាំ២០២២ កន្លងមក។ ហើយនៅកិច្ចប្រជុំថ្នាក់រដ្ឋមន្រ្តីការងារកម្ពុជា-វៀតណាម និងកិច្ចប្រជុំពាក់ព័ន្ធថ្មីៗនេះ ដែលមានឯកឧត្តមបណ្ឌិត អ៉ិត សំហេង និងឯកឧត្តម DAO NGUC DUNG ជាសហប្រធានដឹកនាំកិច្ចប្រជុំរួមគ្នា ក្រសួងទាំងពីរក៏បានចុះហត្ថលេខាលើផែនការសកម្មភាពរយៈពេល ៥ឆ្នាំ (ឆ្នាំ២០២៣-២០២៧) សម្រាប់អនុវត្តអនុស្សារណៈនៃការយោគយល់គ្នា និងសេចក្តីថ្លែងការណ៍រួមគ្នាក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ។
ឯកឧត្តម TRAN HONG HA បានកោតសរសើរពីការរីកចម្រើនរបស់ប្រទេសកម្ពុជាយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ។ វៀតណាមសូមគាំទ្រទាំងស្រុងនូវក្នុងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈរបស់ប្រទេសទាំងពីរ ដែលក្រសួងទាំងពីរបានចុះហត្ថលេខាជាមួយគ្នាថ្មីៗនេះ។ បន្ថែមពីនេះ វៀតណាមក៏នឹងបន្តគាំទ្រ និងសហការជាមួយគ្នាលើវិស័យការងារ និងបណ្តុះបណ្តាលវិជ្ជាជីវៈ រវាងប្រទេសទាំងពីរ និងគាំទ្រឱ្យមានរៀបចំបង្កើតសាលាបណ្តុះបណ្តាលជំនាញវិជ្ជាជីវៈ នៅតាមព្រំដែនសម្រាប់បម្រើឱ្យសេចក្តីត្រូវការរបស់ប្រជាជន និងប្រទេសទាំងពីរ ហើយអាចផ្លាស់ប្តូរគ្រូបច្ចេកទេស និងនិស្សិតទៅវិញទៅមកបាន។ ជាងនេះទៅទៀតវៀតណាមក៏នឹងបន្តផ្តល់អាហារូបករណ៍ដល់និស្សិតកម្ពុជាដើម្បីបានសិក្សារៀនសូត្រក្នុងប្រទេសវៀតណាម។
បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានស្នើសុំឱ្យក្រសួងការងារកម្ពុជា និងវៀតណាម រៀបចំបន្ថែមនូវតម្រូវការចាំបាច់ទាំងឡាយណាដែលពាក់ព័ន្ធនឹងវិស័យការងារ និងបណ្តុះបណ្តាលវិជ្ជាជីវៈ សម្រាប់ដាក់ចូលក្នុងផែនការកិច្ចសហប្រតិបត្តិការរវាងប្រទេសទាំងពីរផងដែរ៕