ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
រាជធានីភ្នំពេញ៖ នៅថ្ងៃទី៩-១០ ខែមីនា ឆ្នាំ២០២៣ ក្រសួងការងារ និងបណ្តុះបណ្តាលវិជ្ជាជីវៈ ក្រោមជំនួយបច្ចេកទេសរបស់អង្គការអន្តរជាតិខាងការងារ (ILO) បានរៀបចំកិច្ចប្រជុំពិគ្រោះយោបល់កម្រិតបច្ចេកទេសលើការបង្កើតគោលការណ៍ណែនាំអាស៊ានស្តីពីចល័តភាពនៃអត្ថប្រយោជន៍របបសន្តិសុខសង្គម សម្រាប់ពលករទេសន្តរប្រវេសក៍ តាមប្រព័ន្ធវីដេអូ ក្រោមអធិបតីភាព ឯកឧត្តម សោម ចំណាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងដឹកនាំដោយ លោក ជួប ណារ៉ាត់ អគ្គនាយករងការងារ និងជាប្រធានគណៈកម្មការអាស៊ានសម្រាប់ការអនុវត្តសេចក្តីថ្លែងការណ៍អាស៊ានស្តីពីការការពារ និងការលើកកម្ពស់សិទ្ធិពលករទេសន្តរប្រវេសក៍ (ACMW) ឆ្នាំ២០២២-២០២៣។ កិច្ចប្រជុំបច្ចេកទេសនេះមានការអញ្ជើញចូលរួមពីតំណាង ACMW នៃរដ្ឋសមាជិកអាស៊ាន អង្គការនិយោជក សហជីព អង្គការសង្គមស៊ីវិល និងស្ថាប័នសន្តិសុខសង្គមនៃរដ្ឋសមាជិកអាស៊ាន និងថ្នាក់តំបន់ លេខាធិការដ្ឋានអាស៊ាន និងអ្នកឯកទេសជាន់ខ្ពស់ពីអង្គការ ILO ប្រមាណជា៨០នាក់។
កិច្ចប្រជុំពិគ្រោះយោបល់នេះត្រូវបានរៀបចំឡើងក្នុងគោលបំណងបង្កើតជាវេទិការួមសម្រាប់រដ្ឋសមាជិកអាស៊ាន និងអ្នកឯកទេសមកពីបណ្តាប្រទេសក្នុង និងក្រៅតំបន់ ជាពិសេសសហគមន៍អភិវឌ្ឍន៍អាហ្វ្រិកខាងត្បូង (SADC) ពិភាក្សា និងចែករំលែកបទពិសោធន៍ កាលានុវត្តភាព និងបញ្ហាប្រឈមនានា ពាក់ព័ន្ធនឹងអត្ថប្រយោជន៍របបសន្តិសុខសម្រាប់ពលករទេសន្តរប្រវេសក៍។
គួរបញ្ជាក់ផងដែរ គោលការណ៍ណែនាំនេះ គឺជាឯកសារមូលដ្ឋានដ៏សំខាន់មួយ ក្នុងការឈានទៅសម្រេចឱ្យបាននូវចល័តភាពអត្ថប្រយោជន៍របបសន្តិសុខសង្គម សម្រាប់ពលករទេសន្តរប្រវេសក៍អាស៊ាន បន្ទាប់ពីប្រមុខរដ្ឋសមាជិកអាស៊ានបានអនុម័តសេចក្តីថ្លែងការណ៍អាស៊ានស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ពលករទេសន្តរប្រវេសក៍នៅក្នុងកិច្ចប្រជុំកំពូលអាស៊ានលើកទី៤០ និងទី៤១ កាលពីខែវិច្ឆិកា ឆ្នាំ២០២២ នៅរាជធានីភ្នំពេញ ព្រះរាជាណាចក្រកម្ពុជា។
ជាលទ្ធផល កិច្ចប្រជុំពិគ្រោះយោបល់បានពិភាក្សាផ្លាស់ប្តូរមតិយោបល់លើសេចក្តីព្រាង Outline នៃគោលការណ៍ណែនាំអាស៊ាន៕
