ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ នាព្រឹកថ្ងៃទី២០ ខែមេសា ឆ្នាំ២០២២ នាយកដ្ឋានពេទ្យការងារ នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយអង្គការអន្តរជាតិខាងការងារ (ILO) បានរៀបចំសិក្ខាសាលាស្តីពីការពង្រឹងការអនុវត្តគោលការណ៍ប្រតិបត្តិស្ដង់ដា ស្ដីពីដំណើរការ និងការគ្រប់គ្រងរោងចក្រ សហគ្រាស តាមគន្លងប្រក្រតីភាពថ្មីក្នុងបរិបទនៃជំងឺកូវីដ-១៩ ក្រោមអធិបតីភាពឯកឧត្តម ឡេង តុង ទីប្រឹក្សាអមក្រសួង និងជាប្រធាននាយកដ្ឋានពេទ្យការងារ នៅសណ្ឋាគារភ្នំពេញ ដោយមានការចូលរួមពីតំណាងក្រសួង ស្ថាប័នពាក់ព័ន្ធ តំណាងនិយោជក តំណាងសហជីព និងអង្គការដៃគូពាក់ព័ន្ធ។
សិក្ខាសាលានេះ មានគោលបំណងដើម្បីពង្រឹងការអនុវត្តគោលការណ៍ប្រតិបត្តិស្ដង់ដា ស្ដីពីដំណើរការ និងការគ្រប់គ្រងរោងចក្រ សហគ្រាស តាមគន្លងប្រក្រតីភាពថ្មីក្នុងបរិបទនៃជំងឺកូវីដ-១៩ ឱ្យកាន់តែទូលំទូលាយដល់កម្មករនិយោជិតតាមរោងចក្រ សហគ្រាស ជាពិសេសវិស័យសំណង់ វិស័យទេសចរណ៍ និងសេវាកម្សាន្ត។
លោក John Ritchotte តំណាងអង្គការអន្តរជាតិខាងការងារ (ILO/BANGKOK) បានបង្ហាញចំណាប់អារម្មណ៍ចំពោះការរៀបចំ នូវគោលការណ៍ប្រតិបត្តិស្ដង់ដានេះ និងលើកទឹកចិត្តឱ្យមានកិច្ចសន្ទនាសង្គមក្នុងការអនុវត្តគោលការណ៍ប្រតិបត្តិស្តង់ដា ជាពិសេសរវាងកម្មករនិយោជិត និយោជក រាជរដ្ឋាភិបាល និងអង្គការដែលជាដៃគូពាក់ព័ន្ធ។
លោក អាត់ ធន់ ប្រធានសហភាពការងារកម្ពុជា បានលើកឡើងអំពីផលប៉ះពាល់នៃជំងឺកូវីដ-១៩ ទៅលើកម្មករនិយោជិត និង សេដ្ឋកិច្ចជាតិទាំងមូល។ លោកបានថ្លែងអំណរគុណដល់ក្រសួងការងារ និងបណ្តុះបណ្តាលវិជ្ជាជីវៈ ដែលរៀបចំ និងដាក់ឱ្យអនុវត្តនូវគោលការណ៍ប្រតិបត្តិស្តង់ដានេះ ព្រមទាំងសំណូមដល់គ្រប់ភាគីពាក់ព័ន្ធ ត្រូវអនុវត្ត ដើម្បីបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ នៅកន្លែងធ្វើការ។
លោក ទេព សុភ័ណ ប្រធានគ្រប់គ្រងទូទៅនៃ សហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) បានបង្ហាញចំណាប់អារម្មណ៍យ៉ាងខ្លាំង ចំពោះការរៀបចំគោលការណ៍ប្រតិបត្តិស្តង់ដានេះ ដើម្បីឱ្យសហគ្រាស គ្រឹះដ្ឋានត្រៀមខ្លួនក្នុងការទប់ស្កាត់ការឆ្លងរាលដាលនៃជំងឺកូវីដ-១៩ តាមគន្លងប្រក្រតីភាពថ្មីក្នុងបរិបទ កូវីត-១៩ ។ ជាងនេះទៅទៀត លោក បានបញ្ជាក់ថា កន្លងមក សមាគមរបស់លោក បានសហការជាមួយក្រសួងការងារ និងបណ្តុះបណ្តាលវិជ្ជាជីវ: ក្នុងផ្សព្វផ្សាយគោលការណ៍ប្រតិបត្តិស្តង់ដានេះ ដល់សមាជិករបស់ខ្លួនផងដែរ។
ក្នុងឱកាសនោះ ឯកឧត្តម ឡេង តុង បានបញ្ជាក់ ពីជោគជ័យនៃយុទ្ធសាស្ត្រ ផ្ការីក របស់រាជរដ្ឋាភិបាលដែលបានជំរុញយុទ្ធនាការនៃការផ្តល់វ៉ាក់សាំងកូវីដ-១៩ ដល់ប្រជាជនគ្រប់ស្រទាប់ គ្រប់វ័យ និងកម្មករនិយោជិត រួមជាមួយនឹងការជំរុញឱ្យប្រជាពលរដ្ឋបន្តអនុវត្តវិធានសុខាភិបាលឱ្យបានម៉ឺងម៉ាត់គ្រប់ពេល ដែលកត្តាទាំងនេះរួមចំណែកកាត់បន្ថយហានិភ័យ និងអត្រាស្លាប់របស់ប្រជាជន ដែលប្រទេសកម្ពុជា ត្រូវបានចាត់ទុកជាប្រទេសទទួលបានជោគជ័យក្នុងការចាក់វ៉ាក់សាំងបង្កាជំងឺកូវីដ-១៩។ ទន្ទឹមនឹងនោះដែរ រាជរដ្ឋាភិបាលកម្ពុជា តាមរយៈក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញនូវវិធានការនានា ដើម្បីឆ្លើយតបនូវបញ្ហានៃជំងឺកូវីដ-១៩នៅកន្លែធ្វើការ តាមរយ:ការរៀបចំនូវលិខិតបទដ្ឋានគតិយុត្តិពាក់ព័ន្ធ រួមជាមួយនឹងវិធានការសុខាភិបាល ដើម្បីបន្តការពារ និងទប់ស្កាត់ការរីករាលដាលជំងឺកូវីដ-១៩ នៅកន្លែងធ្វើការ ដែលក្នុងនោះ ក្រសួងបានដាក់ចេញឱ្យអនុវត្តនូវគោលការណ៍ប្រតិបត្តិស្ដង់ដា ស្ដីពីដំណើរការ និងការគ្រប់គ្រងរោងចក្រ សហគ្រាស តាមគន្លងប្រក្រតីភាពថ្មីក្នុងបរិបទកូវីដ-១៩ សំដៅបន្តឆ្លើយតប និងធានានូវការបង្ការ និងទប់ស្កាត់ការរីករាលដាលនៃជំងឺកូវីដ-១៩ ធានាបាននូវនិរន្តភាព ច្រវ៉ាក់ផលិតកម្ម អាជីវកម្ម រោងចក្រ សហគ្រាស រួមនឹងស្ថិរភាពការងារ និងប្រាក់ចំណូលរបស់កម្មករនិយោជិត។
ជាមួយគ្នានេះដែរ អង្គសិក្ខាសាលាទាំងមូល បានស្តាប់បទបង្ហាញរបស់តំណាងជំនាញការរបស់អង្គការអន្តរជាតិខាងការងារទាក់ទងនឹងផលប៉ះពាល់ និងវិធានការបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ និងតំណាងក្រសួងការងារ និងបណ្តុះបណ្តាលវិជ្ជាជីវ: ទាក់ទងនឹងគោលការណ៍ប្រតិបត្តិស្តង់ដាស្តីពីដំណើរការងារ និងការគ្រប់គ្រង រោងចក្រ សហគ្រាស តាមគន្លងប្រក្រតីភាពថ្មីក្នុងបរិបទនៃជំងឺកូវីដ-១៩៕
