English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាល និងផ្តល់អនុសាសន៍ដល់ប្រតិភូយុវជនកម្ពុជានៃកម្មវិធីនាវាយុវជនអាស៊ីអាគ្នេយ៍ និងជប៉ុន (SSEAYP) លើកទី៥០ សរុបចំនួន ២០នាក់ (ស្រី ១០នាក់) នារសៀលថ្ងៃទី៤ ខែវិច្ឆិកា ឆ្នាំ២០២៦ នៅទីស្តីការក្រសួង ដើម្បីរួមចំណែកតម្រង់ទិស និងពង្រឹងស្មារតីក្នុងការត្រៀមលក្ខណៈសម្បត្តិឱ្យបានល្អប្រសើរ មុននឹងចាប់ផ្តើមចេញដំណើរទៅកាន់ប្រទេសចំនួន ៤ ដែលកម្ពុជានឹងធ្វើជាម្ចាស់ផ្ទះទទួលនាវា (Port-of-call) មុននឹងបន្តដំណើរឆ្ពោះទៅកាន់ប្រទេសម៉ាឡេស៊ី និងហ្វីលីពីន ចាប់ពីថ្ងៃទី៣ ខែមករា ដល់ថ្ងៃទី៥ ខែកុម្ភៈ ឆ្នាំ២០២៧។
នាឱកាសនោះ ឯកឧត្តមរដ្ឋមន្រ្តីបានស្វាគមន៍ និងអបអរសាទរចំពោះយុវជនទាំងអស់ដែលត្រូវបានជ្រើសរើសយ៉ាងល្អិតល្អន់ឱ្យចូលរួមកម្មវិធី SSEAYP លើកទី៥០ ដែលជាមោទនភាពផ្ទាល់ខ្លួន សម្រាប់គ្រួសារ និងសម្រាប់កម្ពុជាទាំងមូល ហើយក៏ជាឱកាសដ៏ល្អក្នុងការភ្ជាប់ទំនាក់ទំនងជាមួយថ្នាក់ដឹកនាំតាមស្ថាប័ននានា ដើម្បីទទួលបានចំណេះដឹង និងបទពិសោធបន្ថែមយកមកសំយោគជាមួយស្ថានភាពរបស់ខ្លួន។ ជំនួបនេះក៏ជាការភ្ជាប់ទំនាក់ទំនងដ៏ល្អរវាងថ្នាក់ដឹកនាំក្រសួង និងយុវជនជំនាន់ក្រោយដែលប្រកបដោយសក្តានុពលផងដែរ។
ឯកឧត្តមបានលើកទឹកចិត្តឱ្យយុវជនកម្ពុជាប្រើប្រាស់ឱកាសដ៏មានតម្លៃនេះឱ្យអស់លទ្ធភាពក្នុងការឈ្វេងយល់ ពង្រីកចំណេះដឹង កសាងទំនាក់ទំនងល្អជាមួយមិត្តរួមដំណើរ និងបង្កើតបណ្ដាញទំនាក់ទំនងគ្រប់ជាតិសាសន៍ ដើម្បីពង្រឹងសមត្ថភាព បទពិសោធ និងកិច្ចសហប្រតិបត្តិការអន្តរជាតិនាពេលអនាគត។ ក្រៅពីនេះ ក៏ត្រូវប្រកាន់ខ្ជាប់នូវឥរិយាបថល្អ ដោយបង្ហាញពីភាពវិជ្ជមាន វឌ្ឍនភាពសេដ្ឋកិច្ច-សង្គម ភាពស្មោះត្រង់ រួសរាយរាក់ទាក់ ឧស្សាហ៍ព្យាយាម និងលើកស្ទួយវប្បធម៌ដ៏ល្អរបស់ខ្មែរបង្ហាញដល់យុវជនបរទេសផងដែរ។ ឯកឧត្តមបានក្រើនរំឭកថា ប្រតិភូយុវជនមិនមែនគ្រាន់តែជាអ្នកចូលរួមប៉ុណ្ណោះទេ ប៉ុន្តែថែមទាំងដើរតួនាទីជាទូតសុច្ឆន្ទៈឆ្លុះបញ្ចាំងពីការប្តេជ្ញាចិត្តរបស់កម្ពុជាចំពោះបដិសណ្ឋារកិច្ច និងមោទនភាពវប្បធម៌។
ឯកឧត្តមសង្ឃឹមយ៉ាងមុតមាំថា ប្រតិភូយុវជនទាំងអស់នឹងធ្វើដំណើរប្រកបដោយសុវត្ថិភាព និងជោគជ័យ ដោយបង្កើនពុទ្ធិ ក្រេបយកចំណេះដឹង និងបទពិសោធបន្ថែមពីប្រតិភូយុវជននៃបណ្តាប្រទេសអាស៊ាន និងប្រទេសជប៉ុន ហើយយកមកចែករំលែកដល់យុវជនជំនាន់ក្រោយ ក៏ដូចជាប្រើប្រាស់សម្រាប់បម្រើការងារ និងមុខរបររៀងៗខ្លួននៅមាតុប្រទេសវិញ ក្នុងនាមជាមូលធនមនុស្សប្រកបដោយថាមពលក្នុងការរួមចំណែកអភិវឌ្ឍសង្គម-សេដ្ឋកិច្ចកម្ពុជា។
សូមបញ្ជាក់ថា ក្នុងកម្មវិធីនាវាយុវជនអាស៊ីអាគ្នេយ៍ និងជប៉ុនលើកទី៥០ ខាងមុខនេះ ប្រតិភូយុវជនតំបន់អាស៊ាន និងជប៉ុន នឹងរួមគ្នាផ្លាស់ប្ដូរមិត្តភាព វប្បធម៌ និងកិច្ចពិភាក្សាលើបញ្ហាសង្គម និងពិភពលោកតាមរបៀបវារៈផ្សេងៗ ដូចជា៖ ការទូតយុវជន ការអប់រំប្រកបដោយគុណភាព បម្រែបម្រួលបរិស្ថាន ទេសចរណ៍ និរន្តរភាពសេដ្ឋកិច្ច សុខមាលភាពសង្គម សង្គមឌីជីថល និងបញ្ញាសិប្បនិម្មិត (AI) ជាដើម៕
#MLVT #HENGSour
