ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
មុននឹងធ្វើជាសាក្សីក្នុងពិធីចុះហត្ថលេខាលើកិច្ចព្រៀងព្រមលើអនុស្សរណៈនៃការយោគយល់គ្នា រវាង សាកលវិទ្យាល័យ ឆាង អាន នៃសាធារណៈរដ្ឋប្រជាមានិតចិន និងក្រសួងការងារ និងបណ្តុះបណ្តាលវិជ្ជាជីវៈ ព្រមទាំងវិទ្យាស្ថានបីទៀតក្រោមឳវាទក្រសួងការងារ និងបណ្តុះបណ្តាលវិជ្ជាជីវៈ ក្នុងនោះរួមមាន វិទ្យាស្ថានជាតិបណ្តុះបណ្តាលបច្ចេកទេស(NTTI) វិទ្យាស្ថានជាតិពហុបច្ចេកទេសកម្ពុជា(NPIC) និងវិទ្យាស្ថានពហុបច្ចេកទេសខេត្តព្រះសីហនុ ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងអំណរដល់សកលវិទ្យាល័យឆាង អាន ដែលបានទទួលស្វាគមន៍ ចំពោះគណៈប្រតិភូកម្ពុជា ដែលបានអញ្ជើញទៅទស្សនកិច្ច នៅសាធារណៈរដ្ឋប្រជាមានិតចិនដើម្បីស្វែងរកកិច្ចសហប្រតិបត្តិការ ជាមួយសកលវិទ្យាល័យនាពេលកន្លងមក ព្រមជាមួយគ្នានេះដែរ ឯកឧត្តមរដ្ឋមន្ត្រី បានវាយតម្លៃខ្ពស់ចំពោះកិច្ចសហប្រតិបត្តិការមួយនេះ ដែលវាស្របទៅនឹងគោលនយោបាយ ដែលជាអតិភាពរបស់រាជរដ្ឋាភិបាលកម្ពុជា ដែលបានយកចិត្តទុកដាក់យ៉ាងខ្លាំងទៅលើវិស័យអប់រំបណ្តុះបណ្តាល បច្ចេកទេស និងវិជ្ជាជីវៈ ។
តាមរយៈMOUនេះ នឹងធ្វើអោយចំណងមិត្តភាពរវាងប្រទេសយើងទាំងពីរ កម្ពុជា-ចិន កាន់តែមានភាពរឹងមាំយូរអង្វែងបន្ថែមទៀត។ ឯកឧត្តម មានប្រសាសន៍ បន្តថា យុទ្ធសាស្ត្ររបស់សាធារណ:រដ្ឋប្រជាមានិតចិន គឺការអភិវឌ្ឍធនធានមនុស្ស និងការអប់រំ បណ្តុះបណ្តាលបច្ចេកទេស និងវិជ្ជាជីវៈ ដែលវាពិតជាមានសារៈសំខាន់ណាស់ ដោយសារតែធនធានមនុស្សដ៏សម្បូរបែបនេះហើយបានជាប្រទេសចិនជាមហាអំណាចសេដ្ឋកិច្ចនៅលើលោក។ លោក Zhang Wei នាយករង នៃសាកលវិទ្យាល័យ ឆាង អាន ក៍បានថ្លែងអំណរគុណ ដល់ឯកឧត្តមរដ្ឋមន្ត្រី និងថ្នាក់ដឹកនាំរបស់ក្រសួង ដែលបានទទួលគណៈប្រតិភូ ខាងសកលវិទ្យាល័យរបស់លោក ហើយខាងសាកលវិទ្យាល័យនឹងបង្កើននូវកិច្ចសហប្រតិបត្តិការបន្ថែមទៀតដើម្បីពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈរបស់កម្ពុជាអោយមានភាពកាន់តែល្អប្រសើរបន្ថែមទៀត។
សូមបញ្ជាក់ថា សកលវិទ្យាល័យ ឆាង អាន ជាសាកលវិទ្យាល័យដ៏ល្បីមួយនៅប្រទេសចិន ជាពិសេសផ្នែកវិស្វកម្មសំណង់ សាងសង់ផ្លូវ និងការគ្រប់គ្រងគមនាគមន៍សាធារណៈ។ សាកលវិទ្យាល័យនេះ នឹងផ្តល់អាហារូបករណ៍មកដល់មន្ត្រីក្រសួងការងារ និងបណ្តុះបណ្តាលវិជ្ជាជីវ:កម្ពុជា កម្រិតបរិញ្ញាបត្រជាន់ខ្ពស់ លើផ្នែកគ្រប់គ្រងសាធារណៈ ចំនែកអាហារូបករណ៍ដល់ត្រូវផ្តល់ជូនសាស្ត្រាចារ្យនៃវិទ្យាស្ថានទាំងបី គឺអាស្រ័យទៅលើមុខជំនាញនីមួយៗដែលវិទ្យាស្ថានមានតម្រូវការ។
តាមរយៈកិច្ចព្រមព្រៀងនេះ សាកលវិទ្យាល័យ ឆាង អាន នឹងមានកម្មវិធីបណ្តុះបណ្តាលមួយដែលទទួលបាននូវសញ្ញាបត្រពីរ សញ្ញាបត្រនៅកម្ពុជាមួយ និងសញ្ញាបត្រនៅប្រទេសចិនមួយ ដែលនិស្សិតត្រូវរៀននៅកម្ពុជាចំនួន០២ឆ្នាំ និងនៅប្រទេសចិនចំនួន០២ឆ្នាំដែរ។ ក្រៅពីនេះសាកលវិទ្យាល័យឆាង អាន នឹងផ្តល់គ្រឿងបរិក្ខារបច្ចេកទេសដល់វិទ្យាស្ថានទាំង៣ដែលជាដៃគូររបស់សាកលវិទ្យាល័យផងដែរ។តាមរយៈកិច្ចសហប្រតិបត្តិការនេះ សកលវិទ្យាល័យឆាង អាន នឹងស្វែងរកនូវមូលនិធិក៍ដូចជាទុនវិនិយោគបន្ថែមទៀតដើម្បីអភិវឌ្ឍន៍វិទ្យាស្ថានជាតិបណ្តុះបណ្តាលបច្ចេកទេសរបស់កម្ពុជាអោយទៅជាសាកលវិទ្យាល័យពហុបច្ចេកទេសមួយនាពេលខាងមុខ៕
