ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
ឯកឧត្តមបណ្ឌិត ពេជ សោភ័ន រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ និងជាអនុប្រធានក្រុមប្រឹក្សាគណៈវិស្វករកម្ពុជា អញ្ជើញបើកសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ អាណត្តិទី២ របស់គណៈវិស្វករកម្ពុជា នៅទីស្ដីការក្រសួងការងារ ថ្ងៃព្រហស្បតិ៍ ១២កើត ខែពិសាខ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២៦ ខែមេសា ឆ្នាំ២០១៨។
ឯកឧត្តមបណ្ឌិត ពេជ សោភ័ន មានប្រសាសន៍លើកឡើងថា ការរៀបចំសន្និបាតបូកសរុបលទ្ធផលការងារប្រចាំឆ្នាំរបស់គណៈវិស្វករកម្ពុជានាពេលនេះ មិនត្រឹមតែបង្ហាញឱ្យឃើញពីការរីកចម្រើនរបស់វិស័យវិស្វកម្មតែប៉ុណ្ណោះទេ ប៉ុន្តែក៏បានបង្ហាញអំពីវឌ្ឍនភាព និងបច្ចុប្បន្នភាពនៃធនធានមនុស្សផ្នែកវិស្វកម្មនៅកម្ពុជាផងដែរ ជាពិសេសសន្និបាតនេះក៏នឹងមានរៀបចំកិច្ចពិភាក្សាលើរបាយការណ៍បូកសរុបលទ្ធផលការងារ ដើម្បីផ្លាស់ប្តូរយោបល់ និងផ្តល់អនុសាសន៍សម្រាប់កែលម្អក្នុងការអនុវត្តការងារឱ្យបានកាន់តែប្រសើរនៅក្នុងឆ្នាំថ្មី។
ឯកឧត្តមរដ្ឋលេខាធិការបញ្ជាក់ថា បើតាម ព្រះរាជក្រឹត្យស្តីពីការបង្កើតគណៈវិស្វករកម្ពុជា ដែលបានចែងថា គណៈវិស្វករកម្ពុជាមានតួនាទីប្រមូលផ្តុំ និងគ្រប់គ្រងវិស្វករទូទាំងប្រទេស ក្នុងគោលបំណងបណ្តុះបណ្តាល និងបន្តលើកកម្ពស់សមត្ថភាពបច្ចេកទេសរបស់វិស្វករកម្ពុជា ឱ្យ ស្របតាមកាលៈទេសៈនៃវិទ្យាសាស្រ្ត និងបច្ចេកវិទ្យាជឿនលឿននាពេលបច្ចុប្បន្ន និងទៅអនាគត។ មូលដ្ឋានចំណេះដឹងសមត្ថភាព ជំនាញ និងបទពិសោធន៍របស់វិស្វករគឺជាកត្តាចាំបាច់ដែលមិនអាចខ្វះបាន ក្នុងការរួមចំណែកអភិវឌ្ឍសេដ្ឋកិច្ច និងកាត់បន្ថយភាពក្រីក្រស្របតាមគោលនយោបាយយុទ្ធសាស្រ្តចតុកោណរបស់រាជរដ្ឋាភិបាលកម្ពុជា។
សូមបញ្ជាក់ថា អគ្គលេខាធិការដ្ឋានគណៈវិស្វករកម្ពុជាបានធ្វើការបណ្តុះបណ្តាលវិស្វករលើមុខជំនាញវិជ្ជាជីវៈវិស្វកម្ម និងបានចុះបញ្ជីវិស្វករសរុបចំនួន ៣ ០៤៥ នាក់ គិតត្រឹមថ្ងៃទី៣១ ខែធ្នូ ឆ្នាំ២០១៧ ដែលក្នុងនោះរួមមាន សំណង់ស៊ីវិល ៧៦% និងអគ្គិសនី ៧,៥% មេកានិច ៣% វិទ្យាសាស្រ្តកុំព្យូទ័រ ៣% ភូគភ្ភសាស្រ្តរ៉ែ ២% គីមីចំណីអាហារ-កសិឧស្សាហកម្ម-ទេពកោសល្យជនបទ និងធនធានទឹក ១% និងជំនាញផ្សេងៗ ៧,៥%។ យោងតាមការសិក្សារបស់អង្គការ JICA កាលពីពេលថ្មីៗកន្លងទៅនេះ ចំនួនទាំងនេះគឺតិចតួចណាស់បើធៀបទៅនឹងតម្រូវការនៃទីផ្សាការងារកម្ពុជា ដែលត្រូវការវិស្វករប្រមាណជា ៣៥ ០០០នាក់ នៅចន្លោះពីឆ្នាំ២០១៨ ដល់ ឆ្នាំ២០២០ សម្រាប់បម្រើឱ្យវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ និងអចលនទ្រព្យ។
