ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ អង្គការអន្តរជាតិខាងការងារ(ILO) សមាគមនិយោជក សហជីព និងស្ថាប័នពាក់ព័ន្ធ បានរៀបចំពិធីពិសារអាហារពេលល្ងាច ដើម្បីអបអរសាទរខួប ១០០ឆ្នាំ នៃការបង្កើតអង្គការ ILO និងខួប ៥០ឆ្នាំ នៃសមាជិកភាពរបស់កម្ពុជានៅអង្គការអន្តរជាតិខាងការងារ នៅសណ្ឋាគារ សុខាភ្នំពេញ នាល្ងាចថ្ងៃទី១២ ខែធ្នូ ឆ្នាំ២០១៩។
ឯកឧត្តមបណ្ឌិត អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានវាយតម្លៃខ្ពស់ចំពោះ ភាគីកម្មករនិយោជិត និងភាគីនិយោជក ដែលកន្លងមក តែងតែបានចូលរួមយ៉ាងសកម្មក្នុងយន្តការត្រីភាគីនានា សំដៅធានាបាននូវសុខដុមរមនាក្នុងទំនាក់ទំនងវីជ្ជាជីវៈនៅកម្ពុជា។ ជាមួយគ្នានេះ អង្គការអន្តរជាតិខាងការងារគឺជាដៃគូកិច្ចសហប្រតិបត្តិការដ៏ល្អដែលមិនអាចខ្វះបាន ដែលបានចូលរួមចំណែកយ៉ាងសំខាន់ក្នុងការអភិវឌ្ឍប្រទេសកម្ពុជា ជាពិសេសវិស័យការងារ និងបណ្តុះបណ្តាលវិជ្ជាជីវៈនៅកម្ពុជា។ ឯកឧត្តមរដ្ឋមន្ត្រី ក៏បានចាត់ទុកកម្មវិធីពិសារអាហារនាពេលនេះ ជាកម្មវិធីនៃការរឹតចំណងសាមគ្គីភាព និងកិច្ចសហប្រតិបត្តិការរបស់យើងទាំងអស់គ្នា និងសូមទទួលបាននូវអារម្មណ៍រីករាយ អនុស្សាវរីយ៍ល្អៗ និងមិនអាចបំភ្លេចបានអំពីកម្ពុជា។
គួរបញ្ជាក់ផងដែរថា ក្នុងឱកាសអបអរសាទរខួប១០០ឆ្នាំ នៃការបង្កើតអង្គការអន្តរជាតិខាងការងារ និងខួប៥០ឆ្នាំនៃសមាជិកភាពរបស់កម្ពុជានៅអង្គការអន្តរជាតិខាងការងារ ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយអង្គការ ILO, សមាគមនិយោជក សហជីព និងស្ថាប័នពាក់ព័ន្ធ រៀបចំកម្មវិធី និងសកម្មភាពសំខាន់ៗ ដូចជា៖
- ពិធីអបអរសាទរខួប១០០ឆ្នាំ នៃការបង្កើតអង្គការអន្តរជាតិខាងការងារ និងខួប ៥០ឆ្នាំ នៃសមាជិកភាពរបស់កម្ពុជានៅអង្គការអន្តរជាតិខាងការងារ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅវិមានសន្តិភាព
- Fun Run ចំនួន ២លើក គឺនៅមុខព្រះបរមរាជវាំង និងនៅសៀមរាប អង្គរ
- កិច្ចសន្ទនាជាន់ខ្ពស់ថ្នាក់ជាតិ ស្តីពី ”អនាគតនៃការងារសម្រាប់ប្រទេសកម្ពុជា”
- វគ្គបណ្តុះបណ្តាលស្តីពី “ច្បាប់ស្តីពីសហជីព និងនីតិវិធីនៃការដោះស្រាយវិវាទការងារ” សម្រាប់មន្ត្រីទទួលបន្ទុកការដោះស្រាយវិវាទការងារនិងចុះបញ្ជីអង្គការវិជ្ជាជីវៈ និងសហជីព
- សិក្ខាសាលាពិគ្រោះយោបល់ត្រីភាគីថ្នាក់ជាតិ “សេចក្តីព្រាងច្បាប់ស្តីពីវិសោធនកម្មច្បាប់ស្តីពីសហជីព”
- វគ្គបណ្តុះបណ្តាលស្តីពីច្បាប់សហជីព និងនីតិវិធីនៃការដោះស្រាយ វិវាទការងារ សម្រាប់មន្ត្រី
- វគ្គបណ្តុះបណ្តាលផ្នែកច្បាប់វគ្គទី១ ដល់តំណាងសហជីព
- វគ្គបណ្តុះបណ្តាលគ្រូបង្គោលស្តីពី “សិទ្ធិធ្វើកូដកម្ម និងធ្វើបាតុកម្មដោយសន្តិវិធី” ចំនួន ៥វគ្គ
- ទិវាជាតិស្ដីពីសុវត្ថិភាព និងសុខភាពការងារ៕