ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ

របៀបចុះឈ្មោះប្រើប្រាស់ប្រព័ន្ធទិន្នន័យរួម

របៀប Upload បញ្ជីឈ្មោះបច្ចុប្បន្នភាពរបស់កម្មករនិយោជិត

រដ្ឋមន្ត្រីក្រសួងការងារ៖ ពិព័រណ៍ការងារអនឡាញ (៤-៥វិច្ឆិកា) រៀបចំឡើងដោយភាពបត់បែន ប្រទាក់ក្រឡា ដែលមានក្រុមហ៊ុនប្រមាណ ១០០ ចូលរួមតាំងបង្ហាញនិងបើកឱកាសការងារជាង ២ម៉ឺនកន្លែង

 ព្រហស្បតិ៍, 04 វិច្ឆិកា 2021 12:37  |    Written by MLVT  |  1660 times  |   Print  |   Email

(ភ្នំពេញ)៖ ការជ្រើសរើសកម្លាំងពលកម្ម និងបើកឱកាសការងារនៅក្នុងបរិបទគន្លងថ្មីនៃដំណើរការទីផ្សារការងារបានកំពុងបង្វែរទិសទៅរកជម្រើសថ្មីមួយដែលអាចរក្សាបាននូវសុវត្ថិភាព, កាត់បន្ថយនូវហានិភ័យ, បំពេញតម្រូវការនៃសកម្មភាពធុរកិច្ច និងធានានូវសុខភាពរបស់អាជីវកម្ម និងកម្មករនិយោជិត។ ជាក់ស្តែង ពិព័រណ៍ការងារអនឡាញរបស់ទីភ្នាក់ងារជាតិមុខរបរ និងការងារ ត្រូវបានប្រារព្ធឡើងចំពេលវេលាប្រកបដោយភាពបត់បែន ប្រទាក់ក្រឡា និងស្ថិតក្នុងស្មារតីទទួលខុសត្រូវខ្ពស់ក្នុងនាមជាអន្តរការីនៃសេវាការងារ សំដៅជួយជំរុញដំណើរការនិងសម្របសម្រួលដល់ភាគីពាក់ព័ន្ធទាំងអស់នៅក្នុងទីផ្សារការងារឱ្យបន្តទទួលបាននូវអត្ថប្រយោជន៍ជាអតិបរមាពីការផ្តល់សេវាការងារសាធារណៈរបស់រាជរដ្ឋាភិបាល។ 

នេះជាការលើកឡើងរបស់ ឯកឧត្តមបណ្ឌិត អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាសឯកឧត្តម អញ្ជើញជាអធិបតីក្នុងពិធីបើក «ពិព័រណ៍ការងារ និងផលិតភាពជាតិ អនឡាញ ឆ្នាំ២០២១» នាព្រឹកថ្ងៃទី៤ ខែវិច្ឆិកា ឆ្នាំ២០២១ តាមរយៈប្រព័ន្ធវីដេអូអនឡាញ ដោយមានគេហទំព័រ www.careerfair.nea.gov.kh រយៈពេល ០២ ថ្ងៃ ចាប់ពីថ្ងៃទី ០៤-០៥ ខែវិច្ឆិកា ឆ្នាំ២០២១ ចាប់ពីម៉ោងៈ ០៨:០០ នាទីព្រឹក - ១៧:០០ នាទីល្ងាច។

 

ឯកឧត្តមបណ្ឌិត អុិត សំហេង អះអាងថា ពិព័រណ៍នេះ បានខិតខំរិះរកវិធីកាន់តែមានប្រសិទ្ធភាពស្របតាមតម្រូវការរបស់និយោជក និងអ្នកស្វែងរកការងារ ដើម្បីបង្កើតនូវបរិយាកាសប្រកបដោយជវភាព និងភាពឆ្លើយតបទាន់ពេលវេលា សំដៅពង្រីកវិសាលភាពការងារ និងការស្រូបយកកម្លាំងពលកម្មដែលមានសក្តានុពល និងជំនាញគ្រប់ប្រភេទចូលទៅក្នុងឱកាសការងារទំនេរគ្រប់វិស័យ។ 

ឯកឧត្តមបណ្ឌិត មានប្រសាសន៍បន្តថា ពិព័រណ៍ការងារអនឡាញឆ្នាំនេះ មានការចូលរួមយ៉ាងសកម្មពីសំណាក់ក្រុមហ៊ុន សហគ្រាសនាំមុខគេសំខាន់ៗរួមទាំងក្រសួង ស្ថាប័ន ដៃគូអភិវឌ្ឍន៍ និងអង្គការជាតិ-អន្តរជាតិចំនួនប្រមាណ ១០០ ដែលបាននាំយកឱកាសការងារគ្រប់ប្រភេទ ប្រមាណ ២ម៉ឺនកន្លែង ដើម្បីផ្សព្វផ្សាយជ្រើសរើសកម្លាំងពលកម្ម ។ ពិព័រណ៍នេះបានបង្កបរិយាកាសប្រាស្រ័យទាក់ទងគ្នារវាងក្រុមហ៊ុន និងអ្នកចូលទស្សនា ឬអ្នកដាក់ពាក្យស្នើសុំការងារបានពីគ្រប់ទីកន្លែង និងគ្រប់ប្រភេទមុខតំណែង ដោយផ្តល់ឱកាសការងារនៅមួយកន្លែងងាយស្រួលនិងចំណេញពេលវេលា ព្រមទាំងការផ្លាស់ប្តូរព័ត៌មានគ្នាទៅវិញទៅមក ចែករំលែកបទពិសោធន៍ ចំណេះដឹង មតិយោបល់ និងអនុសាសន៍ល្អៗ ពាក់ព័ន្ធនឹងការងារ អាជីព ជំនាញ ធនធានមនុស្ស និងការបណ្តុះផ្នត់គំនិតយល់ដឹងពីការបង្កើននិងរក្សាផលិតភាពនៅក្នុងអំឡុងពេលរីករាលដាលនៃជំងឺកូវីដ-១៩។

 

គួរបញ្ជាក់ថា ការផ្គូផ្គងការងារ, ការបញ្ជូនចូលការងារ និងការបំពេញតម្រូវការជ្រើសរើសកម្លាំងពលកម្ម គឺជាភារកិច្ចដ៏សំខាន់ក្នុងការជួយជំរុញដំណើរការទីផ្សារការងារឱ្យប្រព្រឹត្តទៅដោយរលូន តម្លាភាព សមធម៌ ដោះស្រាយបញ្ហាទាន់ពេលវេលា បំប្រួមបញ្ហាប្រឈម និងពង្រីកឱកាសការងារសម្រាប់ទាំងអស់គ្នា។ ក្នុងន័យនេះ ពិព័រណ៍ការងារអនឡាញនឹងបង្កើតជាវេទិកាប្រាស្រ័យទាក់ទងគ្នាពីចម្ងាយ, ធានាគម្លាតសុវត្ថិភាព, បញ្ជៀសហានិភ័យ និងប្រតិបត្តិការដោយគ្មានដែនកំណត់ ជូនដល់សាធារណជនដើម្បីកាន់តែងាយស្វែងរក, ងាយចូលប្រើប្រាស់, ឆ្លើយតបឆាប់រហ័ស, ចំគោលបំណង និងសន្សំសំចៃការចំណាយ។ 

ពិព័រណ៍ការងារនេះគឺជាការអនុវត្តស្របតាមគោលនយោបាយរបស់រាជរដ្ឋាភិបាល ក្នុងការពង្រីកការបើកចំហឱកាសការងារ ដោយផ្តោតលើការយកចិត្តទុកដាក់ក្នុងការជួយបែងចែកឱកាសទាំងនេះឱ្យ បានទៅដល់សាធារណជនគ្រប់រូបប្រកបដោយតម្លាភាព សមធម៌ និងការទទួលខុសត្រូវខ្ពស់ សំដៅប្រែក្លាយឱកាសការងារទាំងអស់ទៅជាមុខរបរកាន់តែប្រសើរសម្រាប់ប្រជាពលរដ្ឋគ្រប់រូប ជាពិសេសការគាំទ្រដល់ការបង្កើតប្រាក់ចំណូលក្នុងជីវភាពគ្រួសារ និងចៀសវាងការធ្លាក់ចូលក្នុងភាពគ្មានការងារធ្វើ ឬភាពក្រីក្រ។ 

សូមសិស្ស និស្សិត អ្នកស្វែងរកការងារ និងសាធារណជនចូលទស្សនាកម្មវិធីពិព័រណ៍ការងារអនឡាញ កុំឲ្យខកខានឲ្យសោះ៕