(ភ្នំពេញ)៖ នាថ្ងៃទី២៤ ខែមេសា ឆ្នាំ២០២៥ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ អញ្ជើញជាអធិបតីបើកសិក្ខាសាលាស្ដីពីការអនុវត្តគម្រោង “កិច្ចសន្ទនាសង្គម និងការបង្កើនសមត្ថភាពដើម្បីពង្រឹងយន្តការបង្ការ និងដោះស្រាយវិវាទការងារនៅកម្ពុជា”។ សិក្ខាសាលានេះត្រូវបានរៀបចំឡើងដោយអង្គការអន្តរជាតិខាងការងារ (ILO) ដែលប្រព្រឹត្តទៅនៅសណ្ឋាគារហិម៉ាវ៉ារី ភ្នំពេញ ដោយមានការចូលរួមពីសំណាក់ តំណាងអង្គការអន្តរជាតិខាងការងារ តំណាងគម្រោងភាពជាដៃគូ ILO-កូរ៉េ ក្រុមប្រឹក្សាអាជ្ញាកណ្តាល មូលនិធិក្រុមប្រឹក្សាអាជ្ញាកណ្តាល សមាគមនិយោជក សហភាពសហជីព សហព័ន្ធសហជីព ផងដែរ។ 

ថ្លែងនៅកម្មវិធីបើកសិក្ខាសាលា លោកជំទាវរដ្ឋលេខាធិការប្រចាំការ បានមានប្រសាសន៍ថា អនុលោមតាមច្បាប់ស្តីពីការងារ យន្តការនៃការដោះស្រាយវិវាទការងារក្រៅប្រព័ន្ធតុលាការ កាន់តែមានភាពពេញលេញដែលផ្តល់ជម្រើសបន្ថែមដល់ភាគីវិវាទ ដែលរួមមាន ការផ្សះផ្សាដោយអធិការការងារ និងអ្នកផ្សះផ្សា និងការដោះស្រាយដោយក្រុមប្រឹក្សាអាជ្ញាកណ្តាល។លើសពីនេះទៀត ក្នុងការអនុវត្តជាក់ស្តែង មុននឹងឈានដល់ការផ្សះផ្សានៅក្រសួងការងារ និងបណ្តុះបណ្តាលវិជ្ជាជីវៈ ក៏មានការចរចា ការសម្រុះសម្រួល និងការផ្សះផ្សា នៅថ្នាក់សហគ្រាស គ្រឹះស្ថានផងដែរ។ 

លោកជំទាវរដ្ឋលេខាធិការប្រចាំការបន្ថែមថា ការដោះស្រាយវិវាទការងារក្រៅប្រព័ន្ធតុលាការ ដោយប្រើប្រាស់នូវវិធីសាស្ត្រនៃការចរចា ការសម្របសម្រួល ការផ្សះផ្សា គឺជាយន្តការមួយដើម្បីជួយបង្កើននូវកិច្ចសន្ទនារវាងភាគីវិវាទមានឱកាសក្នុងការស្វែងយល់អំពីកង្វល់ បញ្ហាប្រឈម និងផលប្រយោជន៍ កាត់បន្ថយភាពតានតឹងរវាងភាគីវិវាទ រក្សាបាននូវទំនាក់ទំនងល្អរវាងកម្មករនិយោជិត និងនិយោជក រក្សាបាននូវភាពជាម្ចាស់នៃដំណោះស្រាយនៅក្នុងវិវាទ ដោយភាគីវិវាទអាចបង្កើតនូវវិធាន និងនីតិវិធីដោះស្រាយផ្ទាល់ខ្លួន ដើម្បីទទួលបាននូវដំណោះស្រាយឈ្នះ-ឈ្នះ បង្ហាញនូវការខិតខំប្រឹងប្រែងដោយភាពស្មោះត្រង់ និងប្រកបដោយមនសិការ ព្រមទាំងចំណេញពេលវេលានិងថវិកាទៀតផង។ 

ទន្ទឹមនឹងនេះលោកជំទាវរដ្ឋលេខាធិការប្រចាំការ បានសង្កត់ធ្ងន់ថា ដើម្បីធានានូវនិរន្តរភាព នៃការកែសម្រួលយន្តការដោះស្រាយវិវាទការងារក្រៅប្រព័ន្ធតុលាការ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំកិច្ចពិគ្រោះយោបល់ជាបន្តបន្ទាប់ជាមួយអន្តរក្រសួង ដៃគូសង្គម និងភាគីពាក់ព័ន្ធ រួមទាំងក្រុមប្រឹក្សាអាជ្ញាកណ្តាល មូលនិធិក្រុមប្រឹក្សាអាជ្ញាកណ្តាល និងអង្គការអន្តរជាតិខាងការងារ (ILO)។ 

ជាចុងបញ្ចប់ លោកជំទាវរដ្ឋលេខាធិការប្រចាំការ បានស្នើជាថ្មីម្តងទៀត ឱ្យគ្រប់ភាគីពាក់ព័ន្ធ ចូលរួមសហការគ្នា ដោយផ្អែកលើមូលដ្ឋានគតិយុត្តជាធរមាន ក្នុងស្មារតីការពារផលប្រយោជន៍រួម សំដៅធានាបានសុខដុមនីយកម្មនៃទំនាក់ទំនងវិជ្ជាជីវៈនៅកម្ពុជា ដែលនេះត្រូវបានទទួលស្គាល់ថា ជាកត្តាស្នូលក្នុងការទាក់ទាញវិនិយោគិន។ 

ទន្ទឹមនឹងនេះ ក្រសួងការងារ និងបណ្តុះបណ្តាលវិជ្ជាជីវៈ សូមស្វាគមន៍រាល់កិច្ចសហប្រតិបត្តិការជាមួយគ្រប់ដៃគូពាក់ព័ន្ធ ដើម្បីផ្លាស់ប្តូរបទពិសោធន៍ ចំណេះដឹង  មតិយោបល់ និងស្វែងរកដំណោះស្រាយទាន់ពេលវេលា និងមានប្រសិទ្ធភាព សម្រាប់បញ្ហាទាំងឡាយស្របតាមតួនាទីភារកិច្ចរបស់ក្រសួងការងារ និងបណ្តុះបណ្តាលវិជ្ជាជីវៈ និងសូមស្វាគមន៍រាល់សកម្មភាពរួបរួមគ្នា ដើម្បីជាប្រយោជន៍ជូនដល់កម្មករនិយោជិត និងសង្គមទាំងមូល ដោយប្រើប្រាស់កិច្ចសន្ទនាសង្គម និងយន្តការត្រីភាគីក្នុងការអភិវឌ្ឍសុខដុមនីយកម្មក្នុងទំនាក់ទំនងវិជ្ជាជីវៈ ដែលធ្វើឱ្យសហគ្រាសមួយក្លាយជាសហគមន៍សុខសាន្តមួយ៕

#MLVT #HENGSour