ឥណ្ឌាមានបំណងជួយកម្ពុជាក្នុងការបណ្ដុះបណ្ដាលវិជ្ជាជីវៈដល់យុវជន លើវិស័យទេសចរណ៍ សុខាភិបាល បច្ចេកវិទ្យា

 Wednesday, 26 June 2019 16:23  |    Written by MLVT  |  101 times  |   Print  |   Email

(ភ្នំពេញ)៖ ក្រុមហ៊ុនមួយរបស់ឥណ្ឌាដែលកំពុងទទួលបានភាពជោគជ័យ ក្នុងការអភិវឌ្ឍវិស័យអប់រំបណ្តុះបណ្ដាលវិជ្ជាជីវៈជាង៧ឆ្នាំនោះ បានបង្ហាញគោលបំណងចង់បង្កើតនូវកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការបណ្ដុះបណ្ដាលវិជ្ជាជីវៈដល់យុវជន ដែលកំពុងសិក្សានៅកម្រិតអនុវិទ្យាល័យ និងយុវជនដែលបោះបង់ការសិក្សា ដើម្បីឱ្យពួកគេទទួលបានជំនាញមួយច្បាស់លាស់ និងមានការងារធ្វើសមរម្យ។

គោលបំណងនេះត្រូវបានលើកឡើងក្នុងកិច្ចជំនួបពិភាក្សារវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយលោក រ៉ាជនីស្ហ កូណាត្រា (Rajneesh Kanotra) ប្រធានផ្នែកទំនាក់ទំនងទីផ្សាររបស់ក្រុមហ៊ុន Centum Learning Ltd នៅទីស្ដីការក្រសួង នារសៀលថ្ងៃទី២៦ ខែមិថុនា ឆ្នាំ២០១៩។ នាឱកាសនោះ ឯកឧត្តមបណ្ឌិតរដ្ឋមន្ត្រី អ៊ិត សំហេង បានសម្ដែងនូវការស្វាគមន៍ចំពោះលោក រ៉ាជនីស្ហ កូណាត្រា ដែលមានបំណងចង់បង្កើតនូវកិច្ចសហប្រតិបត្តិការជាមួយកម្ពុជា ដោយសារនេះជាការចូលរួមដ៏សំខាន់ក្នុងការជំរុញទំនាក់ទំនងរវាងកម្ពុជា និងឥណ្ឌាឱ្យកាន់តែមានភាពល្អប្រសើរ។ ឯកឧត្តមបណ្ឌិតរដ្ឋមន្ត្រី អ៊ិត សំហេង បានមានប្រសាសន៍ថា កម្ពុជា-ឥណ្ឌា ធ្លាប់មានទំនាក់ទំនងល្អជាមួយគ្នាតាំងពីបុរាណកាលមក ហើយបច្ចុប្បន្នស្ថានភាពប្រជាសាស្ត្រ ការគោរពប្រតិបត្តិសាសនា ទំនៀមទម្លាប់ ការរស់នៅរវាងប្រជាពលរដ្ឋកម្ពុជា និងឥណ្ឌាក៏មានភាពប្រហាក់ប្រហែលគ្នាដែរ។

ឯកឧត្តមបណ្ឌិតរដ្ឋមន្ត្រីបានបន្តថា ឯកឧត្តមបានពិនិត្យមើលប្រវត្តិនៃការដំណើរការរបស់ក្រុមហ៊ុន Centum Learning Ltd រួចហើយ ដោយឯកឧត្តមបានកោតសរសើចំពោះភាពជោគជ័យរបស់ក្រុមហ៊ុន និងក៏បានបង្ហើបពីគោលបំណងចង់ឱ្យក្រុមហ៊ុនរបស់ឥណ្ឌាមួយនេះ បង្កើតនូវកិច្ចសហប្រតិបត្តិការជាមួយកម្ពុជា ក្នុងការអភិវឌ្ឍការអប់រំបណ្ដុះបណ្ដាលបច្ចេកទេស និងវិជ្ជាជីវៈយ៉ាងខ្លាំង ដោយឯកឧត្តមបានលើកឡើងថា «ខ្ញុំពិតជាចង់ឱ្យឥណ្ឌាមានវត្តមានលើវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) នៅកម្ពុជាណាស់»។ ជាការពិតណាស់ ក្រុមហ៊ុន Centum Learning Ltd នេះ ពិតជាបានដំណើរការក្នុងការបណ្ដុះបណ្ដាលវិជ្ជាជីវៈ និងអភិវឌ្ឍន៍ជំនាញយ៉ាងជោគជ័យ រយៈពេល៧ឆ្នាំមកហើយ ដោយបានជួយដល់ប្រជាពលរដ្ឋជាច្រើន ទាំងនៅប្រទេសឥណ្ឌា នៅតំបន់អាហ្វ្រិកផងដែរ, នេះបើតាមលោក រ៉ាជនីស្ហ កាណូត្រា។

លោក រ៉ាជនីស្ហ បានឱ្យដឹងទៀតថា ក្រុមហ៊ុនលោកមានគោលបំណងចង់បង្កើតនូវកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការបង្កើតគម្រោងអភិវឌ្ឍន៍ការបណ្ដុះបណ្ដាលវិជ្ជាជីវៈដល់យុវជនកម្ពុជា ដែលកំពុងសិក្សានៅកម្រិតមធ្យមសិក្សាបឋមភូមិ (អនុវិទ្យាល័យ) និងយុវជនដែលបានបោះបង់ការសិក្សាត្រឹមថ្នាក់ទី៩ ដើម្បីឱ្យពួកគេទទួលបាននូវជំនាញវិជ្ជាជីវៈណាមួយ និងទទួលបានការងារធ្វើសមរម្យ ក្នុងនោះមានដូចជាជំនាញបច្ចេកវិទ្យា ទេសចរណ៍ សុខាភិបាល ហិរញ្ញវត្ថុជាដើម។ ឯកឧត្តមបណ្ឌិតរដ្ឋមន្ត្រី អ៉ិត សំហេង បានបង្ហាញនូវការគាំទ្រយ៉ាងខ្លាំងចំពោះគោលបំណងចង់បង្កើតកិច្ចសហប្រតិបត្តិការនេះ ដោយឯកឧត្តមបានចង្អុលបង្ហាញ និងចាត់ក្រុមការងារជំនាញនៃអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ឱ្យធ្វើការពិភាក្សាលើការងារពាក់ព័ន្ធនានា ដើម្បីឱ្យកិច្ចសហប្រតិបត្តិការខាងលើនេះលេចជារូបរាងឡើង និងផ្ដល់ផ្លែផ្កាសម្រាប់ការអភិវឌ្ឍនៅកម្ពុជា។ ឯកឧត្តមបណ្ឌិតរដ្ឋមន្ត្រីបានបន្តទៀតថា នៅកម្ពុជាបច្ចុប្បន្នមានកម្លាំងពលកម្មប្រមាណជាង ១០លាននាក់ ហើយអាត្រានៃកម្លាំងពលកម្មដែលចូលក្នុងទីផ្សារការងារក្នុងមួយឆ្នាំៗ មានមិនដល់កន្លះលាននាក់ទេ ប៉ុន្តែទោះបីជាយ៉ាងនេះក្ដី កម្ពុជាក៏នៅតែមិនអាចផ្ដល់ការបណ្ដុះបណ្ដាលដល់ពួកគេគ្រប់គ្នានៅឡើយដែរ ដែលទាមទារឱ្យមានដៃគូសហការទាំងជាតិ និងអន្តរជាតិ ក្នុងការជួយអភិវឌ្ឍន៍វិស័យនេះឱ្យបានកាន់តែច្រើន។

ឯកឧត្តមបណ្ឌិតរដ្ឋមន្ត្រីបានបញ្ជាក់ទៀតថា គោលបំណងចង់បង្កើតកិច្ចសហប្រតិបត្តិការនេះ គឺស្របទៅនឹងស្ថានភាពដែលកម្ពុជាកំពុងត្រូវការដៃគូសហការបន្ថែម ហើយឯកឧត្តមបណ្ឌិតរដ្ឋមន្ត្រីបានជម្រាបជូនលោក រ៉ាជនីស្ហ កាណូត្រា ថារាជរដ្ឋាភិបាលស្វាគមន៍ជានិច្ចចំពោះកិច្ចសហប្រតិបត្តិការនេះ។ ជាមួយគ្នានោះ លោក រ៉ាជនីស្ហ កាណូត្រា បានបញ្ជាក់ប្រាប់ឯកឧត្តមរដ្ឋមន្ត្រី អ៉ិត សំហេង បន្ថែមថា ក្រុមហ៊ុន Centum Learning Ltd របស់លោក ក៏អាចចែករំលែកបទពិសោធន៍នៃការអភិវឌ្ឍជំនាញវិជ្ជាជីវៈជាមួយកម្ពុជាបានផងដែរ ប្រសិនបើកម្ពុជាមានបំណងចង់ពង្រឹងសមត្ថភាពមន្ត្រីជាគ្រូបង្គោលបន្ថែមទៀត៕